Është shtyrë sërish këtë të enjte seanca në KLGJ për gjyqtaren e Krujës, Enkeleida Hoxha.
“Kërkoj kohë të përgatis parashtrimin tim mbi këtë procedim disiplinor”, ka thnë gjyqtarja në seancë.
Ndërkohë, Inspektori i Lartë i Drejtësisë, Artur Metani u shpreh: “Nuk shoh realisht arsye ligjore për shtyrje sepse avokati ka qenë prezent në çdo seancë dhe ka bërë parashtresën dhe ka paraqitur pretendimet në emër të klientes së tij”.
Por, ai sqaroi më tej se duke u nisur nga pozicioni i gjyqtares do të tregohet mirëkuptues ndaj kërkesës së saj duke aprovuar shtyrjen e seancës.
Seanca e radhës pritet të zhvillohet më 11 mars ora 10.00.
Ditën e sotme, Hoxha mbërriti në ambientet e KLGJ-së me pranga në duar, e shoqëruar nga efektivë policie. Aktualisht ajo është e pezulluar nga detyra.
Pak ditë më parë, Gjykata e Apelit për Krimin e Organizuar dhe Korrupsionin la në qeli gjyqtaren, Enkelejda Hoxha. Gjyqtarja Hoxha u arrestua për korrupsion, pasi ka liruar nga burgu disa persona me të shkuar kriminale.
