Autoriteti i Mediave Audiovizive ka vendosur të shtyjë edhe një muaj fikjen e sinjalit analog. Në një deklaratë për mediat, drejtori i këtij autoriteti Gentian Sala deklaroi se ky vendim vjen pas një sondazhi të bërë ku rezulton se shumica e shqiptarëve vazhdojnë ende të shohin transmetimet analoge.
“Nga sondazhi ka rezultuar se shumë qytetarë shohin ende transmetimet analoge. Në mënyrë unanime, AMA ka vendosur shtyrjen e afatit të transmetimeve analoge edhe për katër javë”, tha kreu i AMA.
Ai theksoi gjithashtu se operatorët duhet të japin informacion për dekoderat si dhe nevojën për përmirësimin e infrastrukturës digjitale.
“Operatorët të japin informacion për dekoderat. Operatorët kombëtarë qe ende nuk mbulojnë me sinjal të marrin masa për infrastrukturën digjitale. Qeveria të ngrejë komitetin për ndjekjen e digjitalizimit që nuk funksionon prej 2017” deklaroi Sala.
Pas kësaj shtyrjeje, fikja e transmetimeve analoge është vendosur të bëhet më 1 Tetor. /Opinion.al
