Censi i popullsisë dhe banesave do të zgjasë deri më 15 Nëntor. Lajmi është bërë i ditur këtë të mërkurë nga drejtoresha e INSTAT, Elsa Dhuli.
Në një dalje për mediat, Dhuli ftoi të gjithë qytetarët që nuk e kanë kryer censin që të bëhen pjesë e procesit.
“Pavarësisht pjesëmarrjes së lartë të qytetarëve në këtë aktivitet rreth 3% e zonave në të gjithë territorin e Shqipërisë, ende nuk janë numëruar. Për këtë arsye në disa zona të bashkive të vendit, mbledhja e informacionit në kuadër të censit do të vazhdojë deri në datën 15 Nëntor 2023”, u shpreh Dhuli.
Ajo theksoi se deri më tani nuk ka rezultate për përfundimin e procesit, por se “flitet për ecuri pozitive”.
Teksa tha se po verifikohet se sa persona nuk e kanë marrë shërbimin, Dhuli deklaroi se ndaj punonjësve që kanë shkelur metodologjinë e punës janë marrë masa respektive.
