Partitë politike do të ketë kohë deri të martën e 23 prillit për t’u regjistruar në zgjedhjet lokale. Shtyrja e afatit është bërë pasi dita e diel është pushim, ashtu si edhe e hëna si festë zyrtare për Pashkën.
Ndërkohë, OSBE/ODIHR ka përsëritur thirrjen këtë të premte që partitë politike të marrin pjesë në zgjedhjet lokale të 30 qershorit.
“Vetëm pak ditë kanë ngelur deri në përfundimin e afatit për regjistrimin e partive dhe ne i nxitim sërish të gjitha partitë që të marrin pjesë në zgjedhjet vendore të 30 qershorit. Zgjedhjet e rregullta forcojnë qëndrueshmërinë dhe besueshmërinë e Shqipërisë si demokraci dhe duhen parë si një mundësi për të propozuar dhe zgjedhur njerëzit më të mirë, që do t’u shërbejnë nevojave të përditshme të qytetarëve, në mbarë vendin”, thuhet në apelin e OSBE/ODIHR./Opinion.al
