Pas shpërthimit të pandemisë së koronavirusit në Lombardi e më pas në gjithë Europën, Holanda ishte një nga ato vende që nuk pranuan të ndërmerrnin masa drakoniane për të garantuar distancimin social të popullësisë.
Por teksa virusi përhapej me ritme të shpejta dhe numri i viktimave shtohej, qeveria e kryeministrit Rutte është detyruar tashmë të ndjekë të njejtën linjë masash si Gjermania, Franca, Italia, Britania e të tjerë.
Qeveria holandeze urdhëroi masa për distancimin shoqëror, mbylljen e shkollave dhe ndalimin e mbledhjeve publike.
Në 24 orët e fundit në Holandë u regjistruan 78 viktima duke e rritur numrin e përgjithshëm në 434.
Instituti Kombëtar i Shëndetit Hollandez (RIVM) gjithashtu raportoi se numri i infeksioneve u rrit me 1.019, ose 16%, në 7,431.
“Numri i pacientëve në spital dhe numri i vdekjeve po rritet më shpejt se sa prisnim nëse nuk do të ishin marrë masa (për të ngadalësuar përhapjen e virusit)”, tha RIVM. “Kjo mund të tregojë se masat kanë pasur ndikim në shpejtësinë e përhapjes së virusit.”.
Izolimi i personave të moshuar në vecanti është bërë i detyrueshëm në Holandë dhe policia ka marrë autorizimin për të imponuar rregullat e reja në mënyrë që të ndërpritet sa më shpëjtë zinxhiri i përhapjes së virusit si edhe numri i viktimave. /Opinon.al
