Franca është një ndër vendet që po raporton situatën më serioze lidhur me atë që konsiderohet, vala e dytë e infeksionit të koronavirusit në Europë.
Duke marrë shkas nga shifrat e regjistruara në javën e fundit, ku vetëm në 24 orët e fundit janë raportuar më shumë se 13 mijë raste me Covid-19 dhe 43 viktima, qeveria franceze ka vendosur kufizime të reja për të frenuar përhapjen e pandemisë.
Në Paris ndalohet grumbullimi i më shumë se 10 personave në hapësira publike, festat e studentëve, ndërsa baret dhe restorantet do të mbyllen pas orës 22:00.
Më të ashpra ishin kufizimet në Marsejë, qytet që konsiderohet epiqendër për transmetimin e virusit. Nga ana e tyre, zyrtarët lokalë kanë kritikuar vendimin e qeverisë duke e konsideruar atë të pajustifikuar.
“Këto masa janë të vështira, por ne jemi të bindur se janë të nevojshme. Fillimisht do të mbyllen baret dhe restorantet si dhe të gjitha strukturat e pritjes së publik, përveç rasteve ku zbatohet një protokoll strikt. Sajtet kulturore si teatrot, muzetë dhe kinematë do të kenë protokolle strikte shëndetësore dhe nuk do të preken nga urdhri për mbyllje”, u shpreh Oliver Veran, ministër i Shëndetësisë./Opinion.al
