Vitet e fundit shumë vende në Itali kanë zgjedhur të shesin shtëpitë për një 1 dollar në mënyrë që të rigjallërojnë komunitetet e tyre të cilat janë në ikje.
Zungoli në afërsi të Napolit dhe Sambuca ishin destinacionet që kanë përdorur skemën e promovimit të shitjes së pronave të shkatërruara për vetëm 1 dollar me shpresën për të tërhequr banorë të rinj.
Por tashmë Cammarata në Siçili ka shkuar edhe më tej duke i dhënë këto shtëpi në këmbim të asgjëje. I dëshpëruar për të shpëtuar vendlindjen e tij nga shuarja, kryetari i bashkisë Vincenzo Giambrone ka kaluar tre vitet e fundit duke bindur pronarët e shtëpive, të cilët i kanë braktisur prej kohësh banesat ku kanë lindur, t’ia japin bosh dhe të shkatërruara siç janë pronarëve të rinj, por në këmbim të asgjëje.
“Nuk mund të duroj teksa shoh këtë vend kaq të bukur, të vjetër plot histori bosh dhe drejt shkatërrimit. Më lëndon. Pronarët janë të pavetëdijshëm për dëmin që shkaktojnë duke braktisur shtëpitë e tyre dhe refuzimit për t’i restauruar. Diçka e tillë lë një plagë të thellë në peisazhin e vendit si dhe frikën e shembjeve të rrezikshme ,”-është shprehur Giambrone, për CNN.
Sipas tij aktualisht ka shumë shtëpi prej guri boshe dhe shumë të tjera do të vijojnë të lirohen në një kohë të shkurtër. Janë të paktën 100 shtëpi të braktisura dhe të gjitha të vendosura në pjesën më të vjetër të Cammaratës, e cila ka potencialin më të madh për të shpëtuar, bën që kryetari i Bashkisë Giambrone të ketë shpresa.
“Tashmë blerësit e rinj mund të vijnë të sigurojnë këto mure që lëvizin dhe të rigjallërojnë pjesën historike,”-shton ai.
Kuptohet që ka disa kushte për skemën e shtëpive ‘falas’ në Cammarata. Blerësit duhet të zotohen që do të restaurojnë banesën deri në 3 vjet nga blerja si dhe të paguajnë 5 mijë euro ose 4.300 dollarë të cilat do t’u rikthehen sapo puna me restaurimin të ketë mbaruar.
Gjithashtu ata duhet të paraqesin një plan të qartë rinovimi për pronën që duan të marrin. Ndërkohë që të gjithë blerësit që plotësojnë këto kritere do të merren parasysh, prioritet do të kenë çiftet e reja me fëmijë. Çiftet që do të banojnë aty dhe do të bëhen me fëmijë do të marrin edhe 1 mijë euro bonus.
Pronarët e rinj mund t’i shndërrojnë banesat në shtëpi private, B&B, hotele, dyqane apo edhe restorante. Shqetësimi më i madh i Giambrones është që vendit ‘t’i kthehet gjallëria’. Cammarata është pjesë e një grupi elitar fshatrash autentikë italianë, të cilët luftojnë kundër ‘zhdukjes’ dhe përpiqen të ruajnë traditën.
I vendosur 60 kilometra në juglindje të Palermos dikur ka qenë një vend plot gjallëri sipas Giambrones. Por ky vend historik ka humbur një numër të madh banorësh gjatë viteve të kaluara dhe shumë prej shtëpive janë të braktisura në ditët e sotme.
Për Cammaratën thuhet se është vendi me 1000 ballkone në lindje, pasi në secilën dritare mund të shihet perëndimi dhe të shijohet një pamje spektakolare të malit Etna.
Blerësit e mundshëm do të priten me krahë hapur pasi vendasit janë të njohur për mikpritjen e tyre./Opinion.al/
