Shtatë persona kanë humbur jetën në të gjithë Evropën, për shkak të stuhisë ‘Ciara’. Erërat e fuqishme në Poloni shkatërruan çatinë e një dyqani, duke vrarë një grua dhe dy vajzat e saj, ndërkohë që babai i tyre u plagos.
Një burrë vdiq pasi varka e tij u fundos në jug të Suedisë. Një person tjetër që gjendej në bord, konsiderohet ende i zhdukur.
Dy veta u vranë në makinat e tyre, një në Gjermani dhe një në Slloveni. Shpejtësia e erës deri në 200 kilometra në orë, u regjistrua edhe në veri të Italisë. Një grua rreth 71 vjeç u vra pasi u godit nga copat e një çatie në rajonin e Lombardisë.
‘Ciara’ e njohur edhe si stuhia ‘Sabine’, ka shkaktuar dëme të mëdha materiale në disa pjesë të Evropës.
Transporti u ndalua dhe shkollat u detyruan të mbyllen në Belgjikë, Gjermani, Luksemburg dhe Holandë.
