Një 33-vjeçare shqiptare humbi tragjikisht jetën në një aksident rrugor të ndodhur në provincën e Rieti në Itali.
Mediat italiane shkruajnë se identiteti i viktimës është Adelina Toska, e cila la pas bashkëshortin dhe dy fëmijët e vegjël, 6 dhe 12 vjeç.
Toska kishte shkuar në Itali disa vite më parë dhe jetonte në Casali di Poggio Nativo, Sabina, ku bashkëshorti punonte si murator.
33-vjeçarja udhëtonte nga Salaria në drejtim të Rieti, me një Peugeot 206, kur u përplas me një Alfa 159 Së që vinte në drejtim të kundërt.
Aksidenti tragjik ndodhi pak pas orës 12:00 të së martës. Sipas të dhënave të publikuara nga mediat fqinje, ka qenë automjeti me të cilin udhëtonte shqiptarja që ka dalë në anë të kundërt të rrugës, duke u përplasur ballë për ballë me mjetin tjetër, megjithatë hetimet për ngjarjen e rëndë vijojnë ende.
I plagosur në gjendje të rëndë mësohet se është edhe drejtuesi i makinës tjetër.
