Një 34-vjeçar shqiptar në Greqi është qëlluar me armë zjarri duke mbetur i plagosur. Ngjarja ka ndodhur në Athinë rreth orës 04:00 të mëngjesit në zonën e Votanikos.
Ashtu siç shihet në foto, policia greke i ka dhënë ndihmën e parë të riut deri sa mbërriti ambulanca e EKAV-it dhe e mori. Mediat greke raportojnë se shqiptari arriti ti mbijetonte sulmit me tre plumba.
34-vjeçari është gjetur në kryqëzimin e Iera Odos me Spyrou Patsis, ku ka kërkuar ndihmë nga kalimtarët.
Sipas informacioneve autorët kanë qenë në një automjet me të cilin janë afruar më pranë me 34-vjeçarin duke e qëlluar tre herë.
Të njëjtat informacione bëjnë me dije se në vendin ku u qëllua janë gjetur dhe konfiskuar tre gëzhoja të kalibrit 9 mm.
34-vjeçari u arrestua në vitin 2019 për një çështje droge, por provat e deritanishme nuk tregojnë për përfshirjen e tij në ndonjë rast tjetër të rëndë.
