Kushëriri i Klevis Sulës, 20-vjeçarit të vrarë pak ditë më parë në Islandë ka rrëfyer për mediat vendaze detaje mbi ngjarjen dhe momentin e përballjes me sulmin me thikë.

Krist Ismailaj, ka treguar se kur ndodhi sulmi me thikë, ai dhe një grup shokësh kanë qenë pranë Klevisit. Pasi e dërguan në spital, miqtë debatuan me njëri – tjetrin nëse duhej t’i thonin familjes së Klevisit se çfarë ndodhi. Më tej ai shton se dëshiron që Klevisi të kujtohet nga të tjerët për vlerat që kishte.

“Të gjithë të lutemi për të dhe t’i japim forcë familjes së tij për të kaluar këtë tragjedi të tmerrshme që i ndodhi. Ishte një 20-vjeçar pa vese dhe asnjëherë nuk i bëri keq askujt. Ai donte që të ishte i qeshur dhe i dobishëm. Ju lutem, kujtojeni atë siç ai e meriton dhe shumë më tepër se kaq”, ka thënë Krist Ismailaj.

Kurse një mik i Klevisit, ka shkruar në Facebook me pikëllim për vdekjen e 20-vjeçarit dhe ka vënë në pikëpyetje vlerat e shoqërisë në Islandë, që konsiderohet si “vendi më i sigurtë në botë”.

Ndërkohë, shokë dhe të afërm të Klevis Sulës kanë hapur një faqe përkujtimore në Facebook për mikun e tyre dhe po mbledhin donacione për të ndihmuar me shpenzimet e varrimit.

Klevis Sula, 20-vjeçari shqiptar në Islandë, u qëllua pak ditë më parë, teksa ndihmoi një person të ulur në rrugë që po qante. Ai së bashku me një shokun e tij shqiptar u ofruan të ndihmonin burrin, por ky i fundit shfaqte probleme të shëndetit mendor dhe i goditi me thikë që të dy. Klevis Sula ndërroi jetë në spital, shoku i tij i plagosur  po merr trajtim mjekësor.

Policia ka arrestuar autorin e vrasjes.