Zgjedhjet e pushimeve këtë vit po i drejtojnë shqiptarët gjithnjë e më shumë drejt bregdetit vendas. Për operatorët duket se shkak është bërë rritja e çmimeve të paketave turistike jashtë kufijve dhe kursi i pafavorshëm i euros ndaj lekut. Ndryshe nga një vit më parë shqiptarët po rezervojnë më shumë për jugun e Shqipërisë, apo edhe për zona malore si Thethi dhe Valbona.
“Këtë vit, në krahasim me vjet, mund të themi se ka rënë pak numri i rezervimeve.Vjet ka qenë paketa 1600-1700 euro, dy të rritur. Këtë vit pa 1900-2000 euro nuk gjen”, shprehet Anjeza Seidini, operatore turistike.
Sipas operatorëve turistikë, nëse vitin e kaluar rreth 60% e pushuesve preferonin të udhëtonin jashtë, këtë vit shifra ka rënë nën 40%. Nga ana tjetër, turet me turistë gjerman kanë nisur që prej muajit Mars.“Dy vitet e fundit ka pasur një bum të jashtëzakonshëm edhe të turistëve të huaj që po vijnë në Shqipëri. Preferohen shumë nga turistët gjermanë, anglezë, italianë, spanjollë, kryesisht të fokusuar tek agroturizmi dhe bëjnë një tur të plotë qyteteve shqiptare për 5-7 ditë”, sipas Seidinit.
Agjencitë turistike raportojnë se rezervimet për paketa turistike dhe kryesisht ture kanë nisur që prej muajit Janar, teksa pritshmëritë e tyre janë optimiste, duke parashikuar një sezon turistik të suksesshëm me një rritje të ndjeshme të kërkesës për pushime brenda vendit.
