Shqipëria vijon të përballet me fenomenin e largimit të të rinjve, kryesisht për shkak të papunësisë dhe pagesave e ulëta.
Por, për kryeministrin Edi Rama shqiptarët që ikin nga vendi vuajnë më shumë se sa ata që qendrojnë këtu. Sipas tij, pavarësisht punës që bëjnë në Europë, në fund të muajit nuk mbeten para.
Zgjidhja për kreun e qeverisë është që të rinjtë të nisin studimet në shkollat profesionale.
“Është gjynah nëse fëmijët nuk janë të prirur të mësojnë shumë dhe të shkojnë në universitet. Por kanë rezultate që në fillim të gjimnazit dhe është gjynah të harxhohet koha për një fëmijë që nuk është i prirur. Ashtu siç kur je në gjimnaz dhe shkon në universitet për diçka që nuk vlen asgjë në tregun e punës. Në rast se shkojnë në shkollat profesionale, janë menjëherë të gatshëm për tregun e punë dhe e dyta janë menjëherë të gatshëm për të sjellë një rrogë në shtëpi. Sa më shumë kalon koha, aq më vështirë do të jetë të shkojnë jashtë vendit. Sot të gjithë ata që bëjnë një punë të zakonshme në Gjermani apo Europë, në fund të muajit nuk i mbetet asgjë. Dëgjoj nëpër kronika që një i ri nuk bën dot një shtëpi, po ku e merr dot një shtëpi. E merr në Gjermani? Nuk ndodh. Është koha të bësh një zgjedhje të kualifikuar për arsimin profesional”, tha Rama.
