Autorja e vëllimit të shumë përfolur erotik ‘50 Shades of Grey’, EL James, ka qenë në qendër të debateve këtë fundjavë, pas portretizimit të shqiptarëve si ‘trafikant’ dhe ‘gangsterë’ në botimin e saj më të fundit, “The mister”.
Në librin erotik personazhi shqiptar, Alessia Demachi, punon si pastruese në një shtëpi aristokratësh pasi u trafikua në Britani të Madhe. Përpos kësaj, Alesia përballet me presionin e babait të saj për t’u martuar me të fejuarin, i cili dëshiron që ajo të jetë një ‘grua tradicionale shqiptare’.
Ambasadori shqiptar në Britaninë e madhe, Qirjako Qirko ka reaguar ashpër ndaj këtij portretizimi, duke ju referuar shkrimit si negativ dhe totalisht surreal, teksa pohon se libri i tregon bashkatdhetarët e tij si kriminelë primitivë.
Ai ka shtuar gjithashtu se përshkrime të tilla krijojnë perceptime shumë të gabuara të popullit shqiptar i cili, vijon ai, është populli me njerëzit më të mirë dhe më miqësorë që mund të njihni në jetë.
“Më vjen shumë keq që ekziston një novelë me informacione të tilla që krijojnë këto përshtypje kaq negative për vendin tim” është shprehur ambasadori shqiptar .
Sipas tij, në Britaninë e Madhe, ‘jetojnë rreth 120 mijë shqiptarë, por vetëm një pjesë e tyre shumë e vogël mund të jetë e përfshirë në çështje ‘kriminale’.
Nuk është hera e parë që populli shqiptar përfshihet në portretizime të tilla, kujtojmë këtu filmin ‘Taken’, ku shqiptarët përshkruhen si kriminelë gjakftohtë dhe trafikantë seksi dhe armësh. Si kundërpërgjigje të kësaj, kompani të rëndësishme turistike, janë përpjekur të rrisin reputacionin e vendit me fushatën e quajtur ‘Taken by Albania’, (të marrë nga Shqipëria, referuar filmit në fjalë, por me konotacion pozitiv në këtë rast).
Zyrtarët e turizmit pranojnë se Shqipëria është parë gjithnjë si ‘’parajsë për banditët, kriminelët dhe gangsterët’, në kulturën popullore. Por insistojnë se, imazhi i krijuar për vendin është ‘tërësisht i pavërtetë’, dhe se Shqipëria është një vend shumë i bukur dhe i sigurt për t’u vizituar dhe për të jetuar. Ata e karakterizojnë vendin si nga të fundit relieve të pa prekura dhe të egra që ekzistojnë në Europë, ndryshe nga vendet e tjera që janë transformuar dhe eksploruar thuajse tërësisht./Opinion.al
