TIRANE- “Nuk është normale që një ish-kryeministër të bëjë thirrje që populli të armatoset dhe kjo është një thirrje kriminale, skandaloze, antikushtetuese, djallëzore dhe unë shpresoj shumë që prokuroria të gjejë kurajën që ta thërrasë Sali Berishën, sepse është vepër penale që të armatosesh dhe është thirrje publike për dhunë”. Kështu u shpreh Saimir Tahiri, në reagimin e tij për deklaratën e Berishës. “Unë besoj se ky është shembulli më i mirë se si ka qeverisur kur ishte në detyrë Sali Berisha, duke treguar shembullin më të mirë dhe mendjen kriminale”, vijoi Tahiri.
Ja çfarë tha më herët Berisha:
“Gjatë qeverisjes sime, Shullazi është arrestuar 4 herë. Shullazi është skandali i radhës i kësaj qeverie, – tha Berisha nga foltorja e Parlamentit. – Kjo qeveri është e përfshirë në skandale të pafundme. Të gjitha këto vetëm për një arsye, për shkak të lidhjeve të ngushta të Shullazit me Ramën dhe Tahirin. Rama e ka shndërruar qeverinë në një organizatë kriminale”.
Më pas, Berisha u bëri thirrje shqiptarëve që të sigurojnë armë zjari për t’u mbrojtur nga organizatat kriminale që mbështeten nga qeveria.
“I sugjeroj qytetarëve të armatosen me armë për të mbrojtur pronat, bizneset, vatrat e tyre, sepse nuk kanë asnjë siguri. Nëse kjo qeveri, si organizatë kriminale, kërcënon opozitën me banda kriminale, të jeni të bindur se hqiptarët do t’jua kthejnë me të njëjtën monedhë, ku nuk mund të gjeni dot vrimë miu ku të futeni. Duhet t’u jepet e drejtë qytetarëve të mbajnë armë, sepse me këtë organizatë kriminale nuk ka rend, nuk ka qetësi. E përsëris, shqiptarët të sigurojnë armë për t’u mbrojtur”.
