Ata që kthehen vullnetarisht pas një procedure azili të dështuar në Gjermani, mund të aplikojnë për ndihmë financiare të kthimit. Kjo procedurë është vlerësuar nga autoritetet gjermane si më pak e kushtueshme sesa dëbimi. Megjithatë nëse personi vendos të rikthehet prap në gjermani ai duhet ta kthejë mbrapsht këtë ndihmë.
Agjencia e lajmeve DPA shkruan se nga viti 2014, këtë ndihmë e kanë përfituar më shumë se 100.000 vetë. Shqiptarët renditen të parët tek ata që e marrin ndihmën gjermane të kthimit, i ashtuquajturi program i federatës dhe landeve për rintegrimin. Rreth 1345 shqiptarë të cilëve i është refuzuar azili janë kthyer në Shqipëri vullnetarisht dhe kanë përfituar nga kjo ndihmë financiare. Të dytët renditen serbët me 1088 pranues të kësaj ndihme. Por edhe shumë azilkërkues të refuzuar nga Gjeorgjia, Rusia, Maqedonia veriore dhe Iraku e marrin ndihmën e kthimit. Më pak ky program është përdorur nga azilkërkues të refuzuar nga Afganistani dhe Turqia.
Në parim një azilkërkues mund të marrë vetëm 1 herë ndihmë në para nga programi i ndihmës. Kush e merr këtë ndihmë dhe pastaj kthehet sërish në Gjermani duhet ta rikthejë atë. Sipas Ministrisë së Brendshme gjermane janë rikthyer 83.000 euro. Ndërsa për programin në vitin 2018 janë shpenzuar 9,5 milionë euro.
Por sipas përgjigjes së qeverisë gjermane ndaj kërkesës së grupit parlamentar liberal, FDP në Bundestag afër 2% e tyre rikthehen sërish në Gjermani. “2506 persona nga 102.761 azilkërkues të refuzuar që janë larguar vullnetarisht, kanë bërë pas rikthimit në Gjermani kërkesë pasuese për azil në vitet 2017-2019”,
Stephan Thomae ka reaguar pas përgjigjes së qeverisë federale. “Çdo vit rreth 1000 kërkesa pasuese të azilit nga azilkërkues të refuzuar me vendim kthimi flasin një gjuhë të qartë. Programin e ndihmës për kthim ai e cilëson si një program që dukshëm krijon “stimuj të gabuar””. /Opinion.al
