Autoriteti i Konkurrencës i ka kërkuar qeverisë të ndërhyjë për rishikimin e pagesave për shërbimet e Aeroportit çdo tre vjet, sikurse parashikohet në kontratën koncesionare të nënshkruar në vitin 2004. Vendimi mban datën 20 korrik dhe saktëson se deri më tani ky detyrim, që buron nga pika 19.2 të kontratës së lidhur mes palëve, nuk është zbatuar.
Kjo konfirmohet edhe nga vetë aeroporti, i cili në një deklaratë për shtyp të bërë në korrik të këtij viti bëri me dije “se vazhdon të zbatojë tarifat e miratuara me ligj nga Qeveria Shqiptare që në vitin 2005 – vit kur filloi koncensioni – dhe këto tarifa nuk janë rritur asnjëherë”.
Ndërkaq, Komisioni i Konkurrencës ka vlerësuar se në këndvështrimin e konkurrencës, TIA ka pozicion monopol në ofrimin e shërbimeve aeroportuale dhe se tarifat e aeroportit janë më të larta në krahasim me vendet e rajonit, shkruan Scan.tv. Për këto arsye, në rekomandim Autoriteti i rekomandon qeverisë që t’i kërkojë Organit të Autorizuar Shtetëror dhe Shoqërisë koncesionare të rishikojnë këto pagesa.
Gjithashtu, për shkak të pozicionit të kompanisë koncesionare, si i vetmi ofrues i shërbimeve ndërkombëtare të transportit të pasagjerëve, rekomandohet që organi shtetëror i autorizuar të hartojë dhe aprovojë një metodologji apo rregullore për vendosjen e tarifave të aeroportit, si edhe tarifat të jenë të orientuara drejt kostos.
Aktualisht, shqiptarët paguajnë biletat e fluturimeve më të shtrenjta në rajon, ndërkohë që pavarësisht deklaratave për ndërtimin e një aeroporti në Vlorë apo vënien në funksion në aeroportit të Kukësit, si alternativa që do të ndikojnë në uljen e çmimeve gjithçka është ende në letër. Po ashtu, edhe kompania me kapital shqiptar e fluturimeve ‘Air Albania’, që pritet të sjellë çmime më të favorshme nuk ka nisur fluturimet.
