Milaim Gashi ka ardhur nga Freiburgu i Gjermanisë për të mbështetur ish-krerët e UÇK-së, gjykimi ndaj të cilëve fillon sot në Hagë. Ai thotë se ndaj tyre po bëhet padrejtësi dhe se ata meritojnë mbështetje.
“Ne jemi këtu me shpall pakënaqësi ndaj gjykatës se Hagës, është një padrejtësi e madhe që po u bëhet krerëve te Ushtrisë Çlirimtare të Kosovës”, thotë ai.
Ai po qëndron para ndërtesës së Gjykatës Speciale ndërsa më vonë do t’i bashkohet protestës së shqiptarëve të diasporës, ku ndodhet edhe djali i Kadri Veselit, Klestori.
Ai me qindra qytetarë të tjerë, janë mbledhur për të protestuar kundër gjykimit të ish-krerëve të Ushtrisë Çlirimtare të Kosovës në Gjykatën Speciale të Hagës.
Bëhet me dije se para pak minutash ka filluar gjykimi i ish-udhëheqësve të UÇK-së.
Prej nëntorit të vitit 2020, ish-krerët e UÇK-së, Hashim Thaçi, Kadri Veseli, Jakup Krasniqi dhe Rexhep Selimi, gjenden në paraburgim në Hagë të Holandës.
Ndërsa në mbështetje të tyre, në prag të fillimit të gjykimit, në Prishtinë është mbajtur një marsh. Ndërkaq sot në Hagë, në afërsi të objektit të Gjykatës Speciale, shqiptarë të diasporës do të mblidhen në një protestë paqes./Opinion.al
