Autoritetet italiane kanë goditur një grup trafikantësh të kryesuar nga shqiptarë. Mediat italiane shkruajnë se shqiptarët janë mendja, italianët dhe afrikanët janë korrierët apo krahët operativë të këtij grupi.
Kreu i organizatës dyshohet se është 41-vjeçari Alfred Leçini. Ai ndodhet në burg ku është i dënuar me 11 vite e 6 muaj dënim.
Sipas mediave vendase, ai i menaxhonte punët e grupit nga vendi i tij i lindjes, Elbasani, që konsiderohet dhe si epiqendra e drogës në Shqipëri.
Ndërkohë, hetuesit dyshojnë se Leçini mbështetet nga 55-vjeçari me origjinë maqedonase Hatim Husejini, me banim në Ferrara, qytet në të cilin u arrestua dy ditë më parë nga policia italiane.
Në vijimësi të operacionit për goditjen e grupit kriminal, në pranga ka rënë dhe 46-vjeçari maroken Nabil Kalchi, së bashku me bashkombësin e tij Marco Cantori. Policia italiane i sekuestroi Klachit një BMWX6, katër mijë euro cash dhe disa çeqe, ndërsa Cantorit 70 gramë kokainë.
Po ashtu në pranga ka rënë dhe 37-vjeçarja shqiptare Alketa Basha dhe 26-vjeçari Fabion Lecini të cilët dyshohet se merreshin me pastrimin e parave. Basha u arrestua në Bresicia, pasi iu gjetën 79 mijë euro cash të fshehura në makina, ndërsa Lecini është kushëriri i bosit të dyshuar të drogës./Opinion.al
