Kreu i Partisë Demokratike ka ngritur akuza ndaj kryeministrit Edi Rama, duke e akuzuar për përdorimin e licencave për mbjelljen e kanabisit që të manipulonte zgjedhjet.
“Në farsën elektorale të 11 majit, Edi Rama përdori të gjitha mjetet, ndër të cilat licencat për mbjelljen në kundërshtim flagrant me ligjin dhe konventat ndërkombëtare të 29 mijë e 300 hektarëve droge,” u shpreh Berisha.
Ai theksoi se, ndërkohë që ligji i miratuar nga qeveria parashikon vetëm 200 hektarë për mbjellje në të gjithë Shqipërinë, në vitin elektoral kjo shifër është shumëfishuar në mënyrë drastike.
“Në vitin elektoral, Edi Rama rrethoi Shqipërinë në të katër anët e saj dhe në thellësi me plantacione droge, vlera e të cilave është kolosale. Në 28 mijë hektarë mund të mbillen dhjetëra milionë rrënjë kanabis, të cilat shkojnë në një vlerë 10 miliardë euro,” theksoi Berisha.
Pjesë nga fjala e Berishës
Në farsën elektorale të 11 Majit 2025, kreu i organizatës kriminale të narkoshtetit shqiptar, Edi Rama, përdori të gjitha mjetet, ndër të cilat licencat për mbjelljen në kundërshtim flagrant me ligjin dhe të gjitha konventat ndërkombëtare të 29 mijë e 300 hektarëve drogë.
Ligji i miratuar nga qeveria lejon, autorizon mbjelljen e 200 hektarëve në mbarë vendin.
Por në vitin elektoral, kjo sipërfaqe u shumëfishua dhjetëra herë, qindra herë.
Pra, në vit elektoral Edi Rama rrethoi Shqipërinë në të katër anët e saj, dhe në thellësi, me plantacione droge, vlera e të cilave është kolosale po të kemi parasysh se në 28 mijë hektarë mund të mbillen dhjetëra milionë rrënjë kanabis, të cilat shkojnë në një vlerë të paktën 10 miliardë euro.
