Shqipëria U-19 kalon në finale

Shqipëria U-19 ka mundur ditën e sotme ekipin e C.R Lazios me rezultatin 2-1 në turneun ‘Roma Caput Mundi’ që po zhvillohet aktualisht në kryeqytetin Italian duke kaluar kështu në finale.
Golin e parë për ekipin e drejtuar nga Erion Bogdani e shënoi Drini Halili, por vetëm disa minuta më vonë C.R Lazio arriti të vinte barazpeshen. Pjesa e parë u mbyll në barazim ndërsa goli i fitores erdhi në pjesën e dytë nga futbollisti Samuel Nezha duke vulosur kështu fitoren dhe kualifikimin e kombëtares për në finale të këtij kompedicioni.
Pas ndeshjes, tekniku Erion Bogdani është shprehur i lumtur për këtë fitore.
“Një sukses i merituar i skuadrës. Po shoh një reagim shumë të mirë të ekipit gjatë gjithë lojës. Në këto ndeshje kam konstatuar një këmbëngulje te çunat për të dominuar dhe ia kanë arritur. Rezultatet i kanë dhënë të drejtë. Shpresojmë që edhe këtë radhë të mposhtim në finale Rumaninë dhe të sjellim trofeun në Shqipëri. Një ritëm i tillë duhet të na shoqërojë gjatë gjithë vitit” u shpreh tekniku Bogdani.
Deri më tani Shqipëria U-19 ka luajtur tre ndeshje ku ka mposhtur Maltën, Greqinë dhe Lazion duke shënuar kështu plotë nëntë gola ndersa ka pësuar vetëm dy.
Finalja e këtij kompedicioni do të zhvillohet nesër në orën 10:30 ku kuqezinjtë do të përballen përsëri si vitin e kaluar me Rumaninë.
Shqipëria U-19 është kampionia në fuqi e këtij turneu pasi vitin e kaluar mposhti kundërshtarin e finales së këtij viti me rezultatin 2-0.