“Shqipëria ndodhet në prag të epidemisë nga gripi. Të dhënat nga 14 qendrat shëndetësore tregojnë se kurba e infeksioneve të sipërme dhe të poshtme ka arritur në mbi 19 mijë. Sipas ekspertëve të shëndetit publik, pragu epidemik është 21 mijë”, raportoi gazetarja Erikleda Dorezi.
Në vend mbizotërojnë infeksionet respiratore të sipërme me 14000 raste në javë, kundrejt atyre të poshtme me 5700 raste.
Nga java e dytë e Janarit numri i infeksioneve është rritur me 2300 raste, apo e thënë ndryshe 12% më shumë raste brenda një jave.
Fundi i Janarit dhe fillimi i shkurtit pritet të sjellë edhe një rritje të metejshme të rasteve.
Krahas gripit i cili po shfaqet agresiv në popullatë, në vend po bashkëqarkullon edhe Covid dhe virusit RSV.
Grupmosha më e prekur është ajo pediatrike dhe mosha e tretë, madje tek fëmijët gripi po shoqërohet me temperaturë të lartë deri në 40 gradë.
Një pjesë e të prekurve kalojnë edhe në pneumoni për shkak të gripit.
Bluzat e bardha rekomandojnë shmangien e përdorimit të antibiotikëve pa kriter. Sipas tyre është e rëndësishme kontakti me mjekun e familjes për çdo shenjë klinikë./ Tv Klan
