Pas panairit të turizmit FITUR në Madrid, destinacionet shqiptare do të jenë pjesë e një tjetër hapësire promovimi. ITB Berlin është panairi më i madh në botë i turizmit, ku vendi ynë merr pjesë me sloganin “Albania All Senses” nga data 5 deri më 7 mars.
Shqipëria në këtë panair do të marrë edhe rolin si vendi i nderit në ITB BERLIN 2025, duke përfituar kështu nga një program 1-vjeçar promovimi. Pjesëmarrjen e këtij viti, ministrja e Turizmit Mirela Kumbaro, në një postim në rrjetet sociale e cilëson si një përfaqësim dinjitoz të Shqipërisë dhe përgatitje për vitin 2025.
“Gjatë tre ditëve, nga data 5 deri më 7 mars do të jemi bashkë me sektorin privat, për të paraqitur më të mirën e ofertës sonë turistike, me një axhendë të pasur aktivitetesh që do të kulmojë me marrjen e “stafetës” si vendi i nderit në ITB BERLIN 2025.”
Oferta turistike dhe potenciali i Shqipërisë do të prezantohen në Gjermani nga 26 tur-operatorë privatë dhe shtatë bashki turistike. Të gjitha ‘shqisat’ që gjenden në Shqipëri së bashku me programet e tyre të dedikuara të promovimit do të shfaqen për tregun e huaj nga Bashkitë Durrës, Vlorë, Gjirokastër, Korçë, Sarandë, Përmet dhe Tepelenë./ Tv Klan
