Shqipëria ka mposhtur me shifrat 5-0 San Marinon në stadiumin “Elbasan Arena”, ndeshje e vlefshme për Botërorin e vitit të ardhshëm që do të luhet në Katar.
Një rezultat i tillë nuk ishte shënuar asnjëherë më parë në ndeshje zyrtare kualifikuese për ekipin kuqezi.
I pari që tundi rrjetën e skuadrës modeste të San Marinos ishte Rey Manaj në minutën e 32. Pjesa e parë u mbyll vetëm me golin e tij. Ndërkohë në të dytën, kuqezinjtë u treguan edhe më agresivë dhe më të saktë para portës.
Qazim Laçi, Armando Broja, Elseid Hysaj dhe Myrto Uzuni lanë shenjën e tyre në këtë ndeshje.
Me këtë fitore, shoqëruar me barazimin 1-1 të Polonisë ndaj Anglisë, Shqipëria renditet tashmë në vendin e dytë të Grupit I, me 12 pikë në 6 ndeshje. Grupin e kryeson Anglia me 16 pikë, ndërkohë që në vendin e tretë renditet Polonia (11 pikë), e ndjekur nga Hungaria (10 pikë), ndërsa mbyllin renditjen Andorra (3 pikë) dhe San Marino (0 pikë)./ Opinion.al
