Një fitore të pastër me rezultatin 3-0 ka marrë Shqipëria në ndeshjen ndaj Andorrës, e vlefshme për eliminatoret e Botërorit 2026.
Kuqezinjtë e dominuan totalisht këtë takim në Air Albania, ndryshe nga ndeshja e parë në Wembley ku u përballën me një prej ekipeve më të mira në botë dhe nënkampione e Europës në fuqi.
Dominimi i Shqipërisë nisi që në minutat e parë dhe kur kishin kaluar 9 prej tyre, Rey Manaj gjeti rrjetën falë një krosimi të saktë nga Asllani. 10 minuta më vonë erdhi dhe dyfishimi i rezultatit, po me Manaj, falë një inkursioni fantastik të Brojës, që ndonëse me pak minuta lojë në këmbët e tij, duket se po fiton pak nga pak formën.
Ndryshimet në formacion sollën një Shqipëri më sulmuese që e goditi disa herë portën e kundërshtarit dhe që në minutën e 92 gjeti dhe rrjetën e tretë të këtij takimi me anë të Uzunit.
Një nga ngjarjet pikante të kësaj ndeshje ishte dhe protesta e tifozëve kuqezi. Të shumtë në numër ata marshuan përpara zyrës së kreut të Federatës Shqiptare të Futbollit, Armand Duka për çështjen e biletave, teksa më pas braktisën shkallët e stadiumit në minutën e tretë.
Kombëtarja tashmë ka marrë 3 pikë në dy ndeshje eliminatore, teksa në qershor kthehet me përballjen me Serbinë, me të cilën duket se do të ketë dhe rivalitetin më të ashpër për vendin e dytë.
