Kryedemokrati Lulzim Basha ditën e sotme, me grupin e ekspertëve, ka prezantuar programin Ekonomik të Partisë Demokratike me të cilin do të hyjë në zgjedhjet e 25 prillit.
“Ekonomia sot është në një situatë emergjente. Shqipëria është shkatërruar gjatë këtyre 8 viteve. Vendi ynë ka të ardhurat për frymë më të ulëta në rajon. Shqipëria fiton kur ekonomia rritet, jo kur shifrat manipulohen për propagandë. Unë besoj se Shqipëria do të fitojë, nën drejtimin e një kryeministri që ka një plan të qartë”, u shpreh Jorida Tabaku, e cila mori e para fjalën.
Më tej, fjalën e ka marrë kreu i Partisë Demokratike, Lulzim Basha, i cili theksoi se plani i PD, i quajtur “Shqipëria fiton”, do t’ua kthejë Shqipërinë shqiptarëve. Ai theksoi se do të dyfishojë ndihmën ekonomike për familjet në nevojë.
“Kemi punuar me ekspertët më të mirë të ekonomisë, por edhe me ndihmën e institucioneve ndërkombëtare dhe partitë tona si motra. Kemi punuar për një plan serioz zhvillimi, i cili do t’ua kthejë Shqipërinë shqiptarëve. Duam të sjellim para jush një program pune, të zbatueshëm, i cili do t’u shërbejë shqiptarëve dhe jo një partie politike. Ne angazhohemi ta zhdukim varfërinë ekstreme. Kjo plagë e tmerrshme dhemb më shumë se kurrë më parë. Hapi i parë do të jetë dyfishimi i ndihmës ekonomike të familjeve në nevojë”, tha Basha./Opinion.al
