Shqipëria është renditur në vendin e tretë në botë nga Organizata Botërore e Turizmit, si një nga destinacionet me performancën më të mirë në rritjen e fluksit të turistëve për tremujorin e parë të vitit 2023.
Shqipëria ka lënë pas jo vetëm vendet e rajonit si Serbinë, Bullgarinë dhe Bosnje-Hercegovinën por edhe Turqinë, që njihet si një nga destinacionet kryesore për pushime në Evropë.
Në dy vendet e para janë Katari dhe Arabia Saudite, mesa duket evenimentet ndërkombëtare sportive të mbajtura në këto shtete kanë ndihmuar në rritjen e numrit të turistëve.
Sipas Organizatës Botërore të Turizmit në Shqipëri në tre muajt e parë të vitit ka pasur një rritje të jashtëzakonshme me 54% të turistëve, duke tejkaluar nivelet para pandemisë.
Ndërkohë edhe në muajin Prill, Shqipëria ka mirëpritur 53% më shumë vizitorë të huaj se prillin e vitit të kaluar.
Sipas të dhënave nga Ministria e Mjedisit dhe Turizmit në katër muajt e parë të vitit 2023 mbi 1,6 milionë vizitorë të huaj e kanë frekuentuar Shqipërinë, ose 57% më shumë se e njëjta periudhë e vitit të kaluar.
Jehona e mediave ndërkombëtare por edhe vëmendja e shtuar tek turizmi pritet të rezervojë një sezon turistik të suksesshëm edhe për këtë vit. Veç rivierës së bregdetit shqiptar, turistët e huaj kanë mundësi të vizitojnë dhe të shijojnë zonat malore si dhe qytetet si Kruja, Berati apo Gjirokastra për turizëm historik dhe kulturor.
Tv Klan
