Kryeministri Albin Kurti ka falenderuar sot publikisht kryeministrin e Shqipërisë, Edi Rama për mbështetjen që do t’i japë Kosovës në dy ditët e ndërrimit të viteve.
Kurti u shpreh se kërkesën për ndihmë Kosova e ka bërë nëpërmjet ministres së Ekonomisë, Artane Rizvanolli.
“Ne e falenderojmë kryeministrin e Republikës së Shqipërisë, Z. Edi Rama, për mbështetjen. Ministrja jonë e Ekonomisë, zonja Artane Rizvanolli e ka bërë një kërkesë të tillë ndaj Republikës së Shqipërisë, për shkak se ne jemi komplementare, ne kemi termocentrale, ata kanë hidrocentrale; ne kemi qymyr, ata kanë ujë”,-tha ai.
Kurti theksoi se bëhet fjalë për dy ditë dhe se Kosova do të mund t’ia kthejë këtë ndihmë Shqipërisë në verë kur t’i nevojiten.
“Dhe bëhet fjalë për dy ditë – ndonëse janë dy ditë, janë të rëndësishme sepse janë të ndërrimit të motmoteve – dhe më pastaj edhe ne do të kemi mundësi t’u ndihmojmë në rast nevoje në verën e vitit ë ardhshëm”,-ka thënë Kurti.
