Shqipëria dhe Qipro kanë nënshkruar një memorandum mirëkuptimi për bashkëpunim në fushën e trajnimeve diplomatike.
Lajmin e bëri të ditur ministri për Europën dhe Punët e Jashtme, Igli Hasani përmes një postimi në rrjete sociale.
Ai thotë se marrëveshja u nënshkrua në Nikozia aty ku ministri për Europën dhe Punët e Jashtme, Igli Hasani, ishte për një vizitë zyrtare.
“Faleminderit për mikpritjen në Nikozia nga homologu im Costantinos Kombos.
Patëm një bisedë shumë të frytshme për forcimin dhe zgjerimin e bashkëpunimit mes dy vendeve tona në fusha me interes të përbashkët.
Vlerësojmë mbështetjen e Qipros për rrugën evropiane të Shqipërisë dhe presim me interes bashkëpunimin e mëtejshëm, veçanërisht gjatë Presidencës Qipriote të Këshillit të BE-së në vitin 2026.
Nënshkruam gjithashtu një Memorandum Mirëkuptimi ndërmjet Akademive tona Diplomatike, për të forcuar aftësitë profesionale dhe për të ndërtuar ura bashkëpunimi mes shërbimeve tona diplomatike”, shkruan Hasani.
