Edy Reja provon shijen e humbjes së parë në stolin e Kombëtares shqiptare. Kuqezinjtë kanë humbur në transfertë, në një ndeshje jo të lehtë.
Me golin e vetëm të takimit, atë të minutës së 22 nga Johann Berg Gudmundsson, Islanda nxori nga shtëpia pa pikë Shqipërinë.
Në ndryshim nga ndeshjet e fundit, Shqipëria e ka nisur këtë takim me shumë grintë dhe dëshirë për të arritur një rezultat pozitiv, në ndeshjen e parë të drejtuar nga italiani Edy Reja.
Rastet për kombëtaren shqiptare nuk munguan dhe për t’u veçuar ishte një goditje e minutave të para nga Hysaj.
Megjithatë, në momentin më të mirë për kombëtaren tonë, ishte Islanda që arriti të shënojë. Gudmundsson depërtoi bukur në mbrojtjen tonë dhe i vetëm me Berishën nuk e pati të vështirë të kalonte Islandën në avantazh.
Përballja me Islandën ishte e treta për Kombëtaren në këto kualifikuese të Euro 2020, me kuqezinjtë që janë në kuotën e 3 pikëve pas fitores me Andorrës e humbjes me Turqinë.
Ndeshja e radhës e Kombëtares në këto kualifikuese është ajo që do të luhet në mbrëmjen e 11 qershorit ndaj Moldavisë në ‘Elbasan Arena’.
***Përballja kundër Islandës, ja formacionet zyrtare***
Shqipëria do të luajë me formacionin 4-3-3 kundër Islandës. Kjo është skema e zgjedhur nga trajneri Edy Reja në këtë takim të rëndësishëm për fatet e grupit që luhet në transfertë.
Tekniku italian ka zgjedhur të zbresë në fushë me lojtarët të cilët ka punuar gjatë javës në stërvitje, duke evituar surprizat.
11-shja e zgjedhur nga Reja nga porta në sulm është: Berisha, Hysaj, Ismajli, Dermaku, Veseli, Xhaka, Basha, Abrashi, Lenjani, Cikalleshi dhe Balaj.
“Shpresoj që në fushë të marrim një rezultat të mirë. Kjo do të na jepte besim dhe do ti tregonte futbollistëve që puna e tyre nuk shkoi dëm. Do të më pëlqente që të hynim në fushë vetëm për të fituar. Kemi nëj rival që ka organizim të mirë. Sigurdson në veçanti është mirë në anën teknike dhe fizike, por ne do të bëjmë lojën tonë”, tha Reja një ditë më parë.
Shqipëria dhe Islanda janë në të njëjtën kuotë pikësh, nga 3 secila në grupin H të eliminatoreve Euro 2020./ Opinion.al
