TIRANË- Rrugët kryesore, sidomos ato të qendrës do të jenë të bllokuara sot në kryeqytet, edhe pse ndeshja Shqipëri-Serbi luhet në Elbasan. Kjo pasi kombëtarja serbe qëndron në një hotel në Tiranë, po kështu edhe tifozët, pjesa më e madhe e tyre janë të vendosur prej ditësh në Tiranë. Përpos tifozëve nga Shqipëria, shumë prej tyre kanë ardhur nga Kosova dhe Maqedonia.
Kështu nuk do të lejohet qarkullimi/parkimi i automjeteve dhe nuk do të lejohet as kalimi i këmbësorëve pranë hotel “Sheraton’’. Nuk do të lejohet qarkullimi tek Univeristeti i Arteve dhe Universiteti Politeknik si dhe nuk do të lejohet parkimi i automjeteve në sheshin “Italia”. Pra e gjithë zona ku qëndron skuadra serbe do të jetë e izoluar, duke bërë që për herë të parë të mos lejohen as këmbësorët.
Bllokimi i rrugëve do të vazhdojë në të gjitha segmentet me të cilat lidhet sheshi “Italia” dhe sheshi Nënë Tereza (korpusi).
Nga ora 12:00-00:00, do të jenë të bllokuara: rr. “Dervish Hima”, “Rruga e Elbasanit”, tuneli i Elbasanit. Pra nuk do të lejohet kalimi i makinave deri në përfundim të ndeshjes në qytetin e Elbasanit.
Policia u bën thirrje tifozëve që do të shkojnë sot në stadium të përdorin aksin rrugor nga autostrada Tiranë-Durrës për të mbërritur në qytetin e Elbasanit.
