Pak çaste na ndajnë nga ndeshja e rëndësishme “Shqipëri-Serbi”, teksa Tv Klan ndodhet aty në fushë për t’ju dhënë çdo informacion në kohë reale.
Gazetari Blendi Fevziu, ndodhet në fushë me fanellën e Demollarit, numri 11, nga ku dhe jep përshtypjet e tij për ndeshjen e sotme dhe çfarë pritet nga të dyja skuadrat.
Ai u shpreh se nuk janë hasur problematika, sidomos nga ama e serbëve nuk ka pasur pretendime negative për mikpritjen në vendin tonë, teksa e krahason me atë të Beogradit në vitin 2014.
“Nuk ka pasur asnjë problem. Edhe reagimet që kanë pasur, e nga serbët nuk kanë pasur pretendime për mikpritjen. Të garantoj që ajo në vitin 2014, pritja jonë në Beograd ka qenë shumë më problematike”, tha ai.
Po kështu, Fevziu thekson se tonet mes vendeve kanë ndryshuar nga më parë, e se nuk janë më aq agresive.
“Kanë ndryshuar tonet, duhet thënë se nuk ka pasur deklarata shumë agresive. Duhet të kemi parasysh se Shqipëria dhe Serbia do të organizojnë një kampionant evropian brenda dy vitëve, por kërkon një lloj bashkëpunimi”, u shpreh ai.
“Vëmendje ka qenë shumë e madhe te problemet e ndeshjes. Në fakt është një ndeshje futbolli”, shtoi ai.
Po kështu, Fevziu mendon se kundërshtarët kanë lojtarë më të mirë, por ekipi ynë është më i bashkuar, më solid.
“Kam dëgjuar njerëz që thonë le të fitojmë këtë ndeshjen, mos të kualifikohemi. Jo, Shqipëria po shkon për tu kualifikuar në Botëror. Serbët në mendimin tim kanë lojtarë edhe më të mirë, por nuk kanë pasur një ekip më solid siç ne. Është një ndeshje e hapur. Të dy pretendojnë vendin e dytë”, tha Fevziu.
