Në emisionin “Opinion”, Armand Duka, ka folur në lidhje me vendimin e UEFA për ndryshimin e stadiumit ku do të luhet ndeshja Serbi-Shqipëri.
Duka tha se edhe FSHF e ka parë si të arsyeshme kërkesën që ndeshja të mos luhej në Beograd, por në Leskovac.
Kreu i FSHF foli edhe për masat ndaj tifozëve.
Armand Duka: Federata e Serbisë kishte vendosur që ndeshja të zhvillohej në Beograd, në stadiumin e Crvena Zvezda, por pas ndeshjes me Anglinë ku ata për shkak të situatës politike në Serbi dhe njerëzit në stadium nuk kishin shumë konflikt me anglezët, por me veten, kanë kërkuar nga ne dhe FIFA që të ndryshojnë vendin e organizimit dhe të shkojmë në Leskovac. Ne e kemi pranuar këtë kërkesë. Stadiumi është shumë i mirë, shumë i vogël, rreth 8 mijë vende.
Blendi Fevziu: 8 mijë? Por Serbia pret një dënim kam përshtypjen.
Armand Duka: Është më i kontrolluar. Besoj se do të jetë më mirë nga pikëpamja organizative edhe për ta. Nëse do të jetë me tifozë apo pa tifozë, pritet…
Blendi Fevziu: Rrezikon Serbia që UEFA të marrë vendimin…
Armand Duka: Ka raporte jo të mira për ndeshjen e fundit kundër Anglisë, por kjo nuk do të thotë që automatikisht Serbia do të dënohet për ta bërë ndeshjen pa praninë e spektatorëve.
Blendi Fevziu: Nga këndvështrimi ynë, është më mirë Leskovaci apo Beogradi?
Armand Duka: Përderisa e kemi pranuar, mendoj që është më mirë, përndryshe do të kishim insistuar për në Beograd. Edhe sikur të mbushet ky, do të kemi më pak tifozë kundërshtarë.
Blendi Fevziu: Po shqiptarët do të lejohen në Leskovac?
Armand Duka: Në një marrëveshje ne nuk kemi pranuar le të themi, tifozë serbë në Shqipëri dhe as ata në Serbi.
