Mbrëmjen e së hënës pritet të luhet ndeshja Shqipëri-Maqedoni, dhe për mbarëvajtjen e saj pritet të angazhohen rreth 900 forca policie pranë stadiumit “Loro Boriçi” të Shkodrës.
Policia e qytetit verior ka publikuar edhe planin e masave, zbatimi i të cilit do të nisë mëngjesin e së hënës, teksa në rrugët kryesore që të çojnë drejt stadiumit nuk do të lejohet parkimi i mjeteve në të dy krahët.
Me qëllim shmangien e konfuzionit, hyrja e tifozëve në stadium do të nisë në orën 17, ndërsa policia bën apel që këta të fundit të jenë të pajisur edhe me mjet identifikimi.
Në planin e masave parashikohen edhe kontrolle të vazhdueshme fizike, për të mos lejuar futjen e sendeve të paligjshme në stadium. Po ashtu, të gjithë dyqanet dhe lokalet përreth “Loro Boriçit” do të mbyllen pas orës 15.
