Shqipëria dhe Kanadaja kanë nënshkruar marrëveshjen dypalëshe për njohjen e kontributeve të sigurimeve shoqërore për efekt pensioni, nga e cila do të përfitojnë të gjithë shtetasit shqiptarë që jetojnë e punojnë në Kanada.
“Është firmosur në Kanada një marrëveshje bashkëpunimi mes Ministrisë së Punëve të Jashtme dhe Ministrisë së Financave për njohjen e pensioneve të të gjithë shqiptarëve në Kanada. Janë 60 mijë shqiptarë që përfitojnë nga kjo marrëveshje dypalëshe”, tha Ministrja e së Ekonomisë dhe Financave, Anila Denaj.
Kjo marrëveshje e bën Kanadanë shtetin e tetë ku shqiptarëve që kanë shtetësi, u njihen si vjetërsi për efekt pensioni, vitet që kanë punuar të siguruar në Shqipëri. Më herët Shqipëria ka nënshkruar marrëveshje të tilla me Turqinë, Gjermaninë, Hungarinë, Rumaninë, Maqedoninë, Luksemburgun dhe Belgjikën, ndërsa aktualisht qeveria shqiptare është në negociata dhe me 4 vende të tjera ku jetojnë dhe punojnë shtetas shqiptarë./Opinion.al
