Trashëgimia folklorike e vendeve të Ballkanit pushtoi rrugët e Korçës mbrëmjen e së premtes. Festivali i Folkut Ballkanik, “Shpirti i Ballkanit”, solli edhe këtë vit, ngjyrat e kostumografisë, muzikës dhe valleve të grupeve nga Shqipëria, Greqia, Bullgaria, Mali i Zi, Kosova, Rumania, Bosnjë- Hercegovina.
Performancës së veçantë të artistëve në rrugë dhe sheshin e Pazarit të Vjetër iu bashkuan qytetarë dhe vizitorë të shumtë, çfarë e ktheu Korçën në një skenë të madhe të harmonisë dhe vlerave të shpirtit ballkanas.
Edicioni i shtatë i Festivalit Ballkanik,veç valleve burimore të traditës,do të sjellë edhe grupet muzikore më të njohur të Rajonit.
“Në këtë edicion shumë të veçantë do ta cilësoja unë, sepse përveç Asambleve Folklorike burime të të gjithë Ballkanit është një traditë e jashtëzakonshme që ne kemi. Do të kemi edhe shumë banda muzikore, kjo është për herë të parë”, tha Blerta Belliu, drejtore e qendrës së Artit dhe Kulturës.
Pjesë e Festivalit të Folkut Ballkanik u bë edhe një grup artistësh nga Franca.
“Jemi të lumtur që jemi këtu. Është hera e parë që vijmë në Shqipëri vijmë nga Franca nga zona e Savojës, në Alpet Franceze. Do të sjellim kërcimet tradicionale të vendit tonë.”
“Jemi të lumtur që jemi këtu, njerëzit janë mikpritës.”
“Jemi grupi që vjen nga Franca, nga provinca e Savojës, afër Italisë dhe Zvicrës. Jemi këtu sepse këtë vit është një kremtim mes Shanberisë dhe Korçës. Jemi këtu për paradën, për të demonstruar kërcimet e Savojës. Savoja është një pjesë që ju kthye Francës në 1870 ndaj është e rëndësishme që t’ju tregojmë të rinjve të gjitha vallet dhe traditat e vjetra të vendit.”
“Kemi ardhur këtu dje dhe kemi mundur t’i takojmë pjesëmarrësit e tjerë. Na pëlqyen shumë traditat e tyre. Është kënaqësi të zbulojmë më shumë rreth traditave të tjera është diçka e bukur.”
Aktiviteti do të vijojë edhe gjatë fundjavës me performancën e grupeve folklorikë dhe muzikorë në Pazarin e Vjetër.
Klan News
