Nga Blendi Fevziu
Ferid Murati ndërroi jetë dje në SHBA. Ishte 87 vjeç. Ai është një nga dy fituesit e çmimit Nobel me origjine shqiptare. Ashtu si edhe Nënë Tereza ai vinte nga shqiptaret e Maqedonisë. Babai i tij kishte lindur ne Gostivar, por u transferua herët në SHBA, ku nga martesa me një vajze amerikane pati 3 djem. Feridi ishte me i madhi.
Karriera e tij nisi si një mjek i thjeshtë, por ai u be ndër kërkuesit dhe shkencëtaret më të njohur të SHBA. Me 1998 mori bashke me dy kolege të tjerë çmimin Nobel për Mjekësi. Ai luajti një rol te rëndësishëm në shpikjen e Viagrës dhe u nderua pikërisht për këtë.
E takova ne Tetor 1999 gjate një vizite në Shqipëri. S’kishte ardhur kurrë në vendin e të parëve të tij. Në fakt thuajse s’kishte jetuar në një mjedis shqiptar, por ishte tejet krenar për origjinën e tij. Ishte bashke me një grup shqiptaro – amerikanësh, qe kishin mbërritur gjithë triumf për të festuar Lirinë e Kosovës atë verë. Bashkë me të ishte edhe Anthoni Athanas.
E shijoi si një fëmijë atdheun e panjohur. Dilte rrugëve, fliste me njerëz, dha një leksion në fakultetin e Mjekësisë dhe premtoi se do kthehej serish. Me sa kujtoj nuk u kthye më, por atë ditë ndersa po ikte kishte gëzimin e një adoleshenti. Me atë përskuqjen karakteristike në faqe dhe me shprehjen tipike amerikane për çdo pyetje tonën shqetësuese: All right!
U prehsh në Paqe Ferid Murati. Faleminderit që ishe krenar për origjinën tënde shqiptare dhe s’e fshehe kurrë.
