Një oficer me origjinë shqiptare në Florida është bërë heroi i ditës në qytezën Longboat Key pasi shpëtoi nga mbytja një burrë dhe fëmijën e tij 2 vjeç.
Rreth orës 10:30 të mëngjesit të së martës së shkuar, babai dhe fëmija shkuan të notonin në detin e Silver Sands Beach Resort.
Brenda disa minutash, një valë e fortë i tërhoqi ata të dy në det të hapur. Babai u përpoq të qëndronte pranë vogëlushit, por po i mbaronin energjinë.
Për fat të mirë, oficeri i policisë, jashtë shërbimit Ermir Vila u ndodh aty pranë dhe hyri në det për t’i shpëtuar. Vila shpenzoi gjithë energjinë e tij për të nxjerrë babain me të birin në breg.
Burri kishte humbur ndjenjat plotësisht kur u nxor në breg por fatmirësisht pas pak momentesh ai filloi të reagonte. Nga ana tjetër fëmija 2 vjeç ishte me fat që kishte kamerdare në krahë të cilat e kishin ndihmuar të qëndronte sado pak në sipërfaqe.
Shefi i emergjencave në qytet, Paul Dezzi tha nëse nuk do të ishte për ndërhyrjen e oficerit Vila, fëmija dhe babai do të ishin mbytur.
Ermir Vila u nderua nga Shefi Dezzi, Ai i dha oficerit një Medalje të Nderit të Longboat Key.
Vetë Vila tha se nuk e ndjen se meriton ndonjë vëmendje të veçantë dhe se ai dhe oficerët me të cilët punojnë përpiqen të bëjnë më të mirën për të ndihmuar të tjerët çdo ditë.
Ajo që i dha edhe më shumë vëmendje ngjarjes ishte dhe konteksti që ajo zhvillohet.
Burri që rrezikoi të mbytej dhe djali i tij janë persona me ngjyrë. Në këtë kohë Shtetet e Bashkuara janë përfshirë nga një valë protestash të cilat kanë në thelb të tyre diskriminimin racor dhe po kërkojnë reformë në polici. Këto revolta janë nxitur nga disa vrasje të një pas njëshme të afro-amerikanëve nga forca policie, vrasje për të cilat nuk është mbajtur ende përgjegjësi.
Padyshim që veprimi i oficerit me origjinë shqiptare tregon anën tjetër të medaljes, atë se ka nga ata oficerë që vendosin në rrezik edhe jetën e tyre për të shpëtuar qytetarët pavarësisht ngjyrës së lëkurës së tyre. /Opinion.al
