52 emigrantë nga Sudani dhe nga Jemeni janë shpëtuar falë bashkëpunimit të Rojeve Bregdetare greke, turke dhe nga efektivët shqiptarë të anijes ‘Butrinti’, pasi po rrezikonin të mbyteshin teksa udhëtonin me gomone në brigjet turke.
Këtë lajm e ka bërë të ditur vetë Ministri i Mbrojtjes Niko Peleshi në një reagim në rrjetet sociale, ku thekson se ky operacion i suksesshëm tregon rëndësinë e bashkëpunimit dhe koordinimit mes vendeve në luftën kundër emigracionit të paligjshëm dhe trafikut të njerëzve.
“Një tjetër histori suksesi nga efektivët tanë të anijes “Butrinti”! 52 emigrantë nga Sudani dhe Jemeni u shpëtuan nga një gomone në rrezik në brigjet turke, falë bashkëpunimit mes Rojës Bregdetare greke dhe asaj turke. Ky operacion i suksesshëm tregon rëndësinë e bashkëpunimit dhe koordinimit mes vendeve në luftën kundër emigracionit të paligjshëm dhe trafikut të njerëzve. Krenarë që efektivët tanë, pjesë e misionit SNMG2 TU 01, vazhdojnë të bëjnë një punë të jashtëzakonshme dhe të jenë shembulli më i mirë i përkushtimit dhe sakrificës”, ministri i Mbrojtjes./Opinion.
