Eshtë mësuar tashmë se banesa e Naim Kaçorrit ka qenë shenjestra e atentatorëve që shpërthyen me tritol derën e banesës së tij dhe shkaktuan dëme të mëdha në pallatin “Riviera” në Tiranë të Re. Sakaq lidhur me shkaqet, policia po heton atë të hakmarrjes ndaj të birit. Gjithsesi burimet thonë se kjo është një ndër pistat, pasi ka edhe të tjera.
Mësohet se Naim Kaçorri, që ka qenë ish-drejtor i Albetelekom, dega Durrës, disa vite më parë, ka një djalë që jeton në Spanjë. Dyshohet se konfliktet e të birit kanë çuar në ngjarjen e rëndë.
Nga mënyra se si ishte vendosur tritoli dhe sasia, hetuesit mendojnë se ka qenë vetëm një paralajmërim për familjen Kaçorri, pra autorët nuk kanë pasur plan të hedhin në erë familjarët.
Në momentin e shpërthimit në korridor ka qenë dhe një banore e pallatit e cila nga forca shpërthyese është përplasur pas një dere dhe është rrëzuar.
Sakaq, policia ka marrë në pyetje pronarin e banesës ku iu vendos tritoli, i cili ka deklaruar të mos ketë konflikte me asnjë person. Po ashtu janë pyetur edhe banorët e pallatit.
