Detaje të reja janë bërë me dije nga shpërthimi i ndodhur në një fabrikë peshku në Prevezë të Greqisë ditën e sotme, ku mbetën të vdekur dy presona, ndërsa u lëndua rëndë një tjetër.
Mediat greke bëjnë me dije se viktimat janë 39-vjeçari grek Gerasimos Fatouros,babai i tre fëmijëve dhe një 40-vjeçar me origjinë shqiptare, emri i të cilit nuk është bërë ende publik. Të njëjtat burime bëjnë me dije se trupi i 39-vjeçarit Gerasimos Faturou është gjetur i ndarë në dysh.
Ndërkohë, gruaja e tij në momentin që mori vesh lajmin e rëndë ka humbur ndjenjat dhe është dërguar me urgjencë në spital. Gruaja e tij 37-vjeçare kishte humbur dy motrat e saj në një aksident automobilistik disa vite më parë dhe tani ajo po përballet me një tragjedi të re.
Sakaq, i plagosuri tjetër i cili ishte dërguar në spital dhe raportohet se është jashtë rrezikut për jetën.
Dy viktimat po kryen saldim elektrik kur ndodhi shpërthimi tragjik. Ata u plagosën rëndë dhe ndërruan jetë pak më pas.
Gjithçka ka ndodhur brenda pak minutash, ndërsa ngjarja tragjike mësohet se ka ndodhur për shkak të një shpërthimi në bombola gazi. Menjëherë në vendngjarje kanë mbërritur autoambulancat dhe ekipet zjarrfikëse që kanë nisur operacionin e shpëtimit./Opinion,al
