Dy të vdekur janë gjetur nën rrënoja, pas një shpërthimi që rrafshoi një ndërtesë katërkatëshe në qytetin jugor francez të Marsejës.
Autoritetet lokale bëjnë me dije se gjashtë persona rezultojnë të humbur nën rrënoja dhe se përpjekjet e shpëtimit po vazhdojnë.
Shpërthimi ndodhi në lagjen La Plaine në orën 00:49 të së dielës.
Shkaku mbetet i ende i paqartë, por hetuesit po shqyrtojnë mundësinë e një rrjedhje gazi.
Pesë persona nga ndërtesat fqinje pësuan lëndime të lehta nga shpërthimi dhe rreth 200 njerëz janë evakuar nga shtëpitë e tyre.
Rreth 100 zjarrfikës shkuan në vendngjarje për të shuar një zjarr që ishte përhapur nën rrënoja, gjë që e bëri të vështirë kërkimin për ekipet e shpëtimit.Operacionet e shpëtimit vazhduan deri në orët e para të së hënës me ndihmën e një vinçi dhe dritave.
Në një deklaratë të shkurtër që njoftonte zbulimin e trupave, zjarrfikësja tha se “duke pasur parasysh vështirësitë e ndërhyrjes, nxjerrja e trupave nga rrënojat do të marrë kohë”. Një gjimnaz lokal dhe dy shkolla janë hapur për të akomoduar njerëzit që u është dashur të largohen nga shtëpitë e tyre.
Presidenti francez Emmanuel Macron tha në Twitter se ai “po mendonte për të prekurit dhe të dashurit e tyre” dhe falënderoi punonjësit e urgjencës për përpjekjet e tyre.
Kryetari i bashkisë së Marsejës Benoît Payan tha se ekipet e shpëtimit mbetën “të vendosur” për të gjetur njerëz të gjallë.
“Shpresa duhet të na mbajë,” tha ai.
Në vitin 2018, standardet e strehimit në Marsejë u vunë nën vëzhgim pasi dy ndërtesa të rrënuara në lagjen e klasës punëtore të Noailles u shembën, duke vrarë tetë njerëz.
Pas atij incidenti, organizatat bamirëse vlerësuan se 40,000 njerëz në qytet jetonin në shtëpi të keqndërtuara, por të dielën zyrtarët u duk se përjashtuan çështjet strukturore si një shkak të kolapsit të fundit./Opinion.al
