Deputeti socialist Bujar Çela i cili mbeti i plagosur nga shpërthimi në një objekt në pronësi të tij, është futur në sallën e operacionit në spitalin e Traumës.
Për gjendjen shëndetësore të tij, ka folur shefi i Urgjencës së Traumës Gjovalin Bushi. Ai tha për mediat se gjendja e deputetit është e qëndrueshme, duke theksuar se ka pësuar dëmtime në bark.
“Deputeti është intervenuar në kirurgjinë e Lushnjës, kanë parë dëmtime të mëdha. Këtu e riekzaminuam dhe tani sapo u fut në sallë. Ka dëmtime te barku, ka edhe brenda në abdome. Si gjendje deputeti që nga momenti që erdhi dhe tani është stabël. Ka shumë dëmtime, metalike që duhet të largohen…”, tha shefi i Urgjencës së Traumës Gjovalin Bushi.
Bushi është shprehur se të edhe dy të lënduarit janë në gjendje të stabël. Si pasojë e shpërthimit, humbën jetën dy persona, ndërsa mbetën të plagosur 7 persona.
