Qeveria në Liban jep dorëheqjen, pas shpërthimit më 4 gusht në Bejrut.
Përgjatë fjalimit të tij, kryeministri i Libanit, Hassan Diab, ka thënë se iu bashkohet thirrjeve të popullit për të gjetur përgjegjësit që kanë nxitur “këtë krim”.
Më herët kishin dhënë dorëheqjen Ministri i Mjedisit në Liban, Damianos Kattar, ministrja e Informacionit Manal Abdel Samad, 6 deputetë si dhe ambasadorja e Libanit në Jordani. Ata kishin deklaruar se nuk duan të kenë të bëjnë më me qeverinë e korruptuar të Hassan Diabit.
Protestat e dhunshme në Beirut nisën pas shpërthimit të 4 gushtit, ku humbën jetën mbi 200 persona dhe u lënduan mijëra të tjera.
Shpërthimi ndodhi në portin e qytetit, në një depozitë nitrati amoni që mbante më shumë se 2500 tonë nga substanca e rrezikshme që përdoret edhe për bomba.
Sipas raportimeve, më shumë se 300 mijë persona kanë mbetur pa shtëpi dhe thuajse 50% e godinave në Bejrut kanë pësuar dëmtime pas shpërthimit tragjik.
Kostot ekonomike të kësaj tragjedie mendohet të arrijnë te 5 miliardë dollarë, duke çuar në prag të falimentimit Libanin, një shtet që ishte në vështirësi ekonomike edhe para tragjedisë, me protesta të shumta që po zhvilloheshin në të gjithë vendin./Opinion.al
