Ngjarja e rëndë e Ballshit, me 1 viktimë e 6 të plagosur cilësohet nga kompania private që menaxhon rafinerinë, si një incident. Shoqëria IRTC përmes një njoftimi për mediat thotë se shkak është bërë ndërprerja e energjisë elektrike. Sipas saj nuk ka funksionuar as linja rezerve e energjisë. Po sipas kompanisë, gabimi ka qenë edhe njërezor, gjatë rivënies në punë të repartit të hidropastrimit.
Ndryshe nga kompania, punëtorët dhe Kryetari i Bashkisë Mallakastër, Agron Kapllanaj, deklaruan mbrëmë se shpërthimi dyshohet se ndodhi nga prishja e valvulës së depozitës.
Rafineria e naftës në Ballsh u vu në punë në shtator, pasi Qeveria ia dha kompanisë Ionian Refining dhe Trading Co (IRTC). “Kompania blerëse ka përfaqësues ligjor Taulant Musabelliun, që është administratori i kompanisë “Sulaj Progres Group” në pronësi të biznesmenit Besnik Sulaj, siç njihet ndryshe “Beso i Taivanit”, ka deklaruar PD-ja.
Më poshtë deklarata e kompanisë për shërthimin në Ballsh mbrëmjen e së enjtes
Rreth orës: 22:30, në Rafinerinë e Ballshit ka ndodhur një incident i izoluar për shkak të shpërthimit të një prej depozitave të hidrogjenit me një kapacitet rreth 40m3, dhe fatkeqësisht si pasoje e këtij incidenti ka humbur jetën një punëtor si dhe janë plagosur 6 të tjerë.
IRTC shpreh dhimbjen dhe solidaritetin me familjarët për humbjen e parakohshme të njeriut të dashur dhe bashkëpunëtorit tone të vyer për shkak të këtij incidenti. IRTC do të jetë pranë tyre në këtë moment të vështirë dhe do të bëjë gjithçka që është e mundur për ndihmuar ata për kaluar këtë fatkeqësi.
Ky incident është shkaktuar nga ndërprerja e paparalajmëruar energjisë (çuditërisht është ndërprere 2 here brenda tre ditëve), mosfunksionimi i linjës rezerve te energjisë si dhe për shkak të një gabimi njerëzor gjate rivënies ne punë të repartit të hidropastrimit.
Incidenti ka prekur vetëm një depozitë hidrogjeni me një kapacitet rreth 40m3, e cila përdoret vetëm në rast e rivënies në punë të këtij reparti. Rafineria është rikthyer në funksion të plotë pas izolimit të këtij incidenti fatkeq të cilin do ta trajtojmë me solidaritetin dhe në respekt të plotë të të gjitha kërkesave ligjore dhe dinjitetit të punës dhe jetës.
Duam të falënderojmë të gjithë punonjësit për punën dhe sakrificën e jashtëzakonshme për izolimin e incidentit në një kohe shumë shkurtër. Jemi të angazhuar të garantojmë siguri të plotë gjate ushtrimit të aktivitetit në rafineri në përputhje me standardet dhe praktikat me te mira.
