Tragjedia në Ballsh ishte e paralajmëruar. Punëtorët e kishin njoftuar problemin me valvulën që nuk punonte prej disa ditësh.
Kryetari i Bashkisë së Mallakastrës, Agron Kapllanaj në një lidhje telefonike për Neës 24 do të shprehej se nga bisedat që ka pasur me një prej teknikëve në rafineri, dyshohet që shkak për shpërthimin të jetë bërë valvula që shkarkonte.
“Ka qenë e shkruar në procesverbal 3-4 ditë më parë, ishin njoftuar edhe eprorët, që valvula nuk punonte dhe shkarkonte. Ishte rritur presioni në maksimum dhe në atë moment ka shpërthyer”, – tha ai.
Në momentin e shpërthimit në uzinë kanë qenë rreth 100 punëtorë. Nga flakët e mëdha që përfshinë uzinën, mbeti një viktimë dhe 5 të tjerë janë të plagosur, dy prej tyre me plagë djegie të mëdha.
