Partia Demokratike ka reaguar ndaj deklaratave të Taulant Ballës dhe Elisa Spiropalit se pas shpërthimit me tritol në një prej shtyllave të të tensionit të lartë qëndrojnë njerëzit e opozitës.
Në një reagim zyrtar kjo forcë politike thekson se kjo është propagande helmuese.
“Një shpifje e tillë tregon dëshpërimin e thellë të shefit të Taulantit dhe të Elisës, i cili e ka lidhur fatin me krimin dhe porositësit e tritolit. Nëse ai nuk ka dorë në këtë propagandë helmuese, Edi Rama, i cili ka kontroll të plotë mbi policinë, shërbimin sekret dhe prokurorinë, duhet të zbulojë pa vonesë ata që kanë urdhëruar dhe kanë vendosur tritolin në shtyllën e tensionit të lartë. PD dënon me forcë këto shpifje djallëzore të nivelit të Griseldës, që bëhen për të nxitur urrejtjen dhe për të rritur konfliktin në vend”, theksohet në reagim.
Në fakt edhe në njoftimin zyrtar, policia e Durrësit ishte korrekte duke mos treguar gishtin e fajsësisë as nga opozita, por theksonte se po punohet për të identifikuar autorin apo autorët. /Opinion.al
