Detaje të reja janë mësuar lidhur me shpërthimin e ndodhur mbrëmjen e djeshme në një servis motorësh në Vlorë.
Janë sekuestruar pamjet filmike të kamerave të sigurisë të ndodhura tek lagjia, për të mësuar më shumë detaje mbi ngjarjen e djeshme.
Lenda plasëse ishte vendosur në pjesën e jashtme të servisit, tek dritarja e biznesit, duke shkaktuar kështu dëme materiale.
Paraprakisht, burime për Klan News, bëjnë me dije se një shtetas është parë t’i afrohet biznesit pak para shpërthimit, por kjo është diçka që duhet verifikuar.
Sakaq, janë marrë në pyetje qiramarrësi i objektit dhe punonjësit e tij.
Dyshimet paraprake të policisë, marrë parasysh profilin e pronarit që është pa procedime penale të mëparshme, janë për ndonjë konflikt të çastit ndodhur në servis.
Kujtojmë se ngjarja ndodhi mbrëmjen e djeshme, rreth orës 23:00, në lagjen “Bashkimi”, ku një tritol i vendosur në dritaren e biznesit të shtetasit V.B., ka shpërthyer.
Ende nuk ka një autor për rastin, teksa vijojnë hetimet për zbardhjen dhe dokumentin e plotë të ngjarjes.
