Policia ka reaguar lidhur me shpërthimin e një automjeti në Gramsh, ku mbetën të plagosur dy persona.
Uniformat blu bëjnë me dije se në momentin që ka shpërthyer automjeti ka qenë në ecje.
Nga shpërthimi kanë mbetur të plagosur dy persona të cilët janë vëllezër.
“Rreth orës 17:20, në lagjen “Xhile Liçi”, Gramsh, automjeti tip “Ford Focus”, që drejtohej nga shtetasi A. M., gjatë kohës që automjeti ka qenë në lëvizje, në rrethana ende të pa qarta ka shpërthyer.
Si pasojë është dëmtuar shtetasi A. M. dhe pasagjeri shtetasi E. M. (vëllezër), të cilët janë transportuar për ndihmë mjekësore në spital.
Grupi hetimor nën drejtimin e Prokurorisë po kryen veprimet për sqarimin e rrethanave të ngjarjes dhe përcaktimin e shkakut të shpërthimit të automjetit”, njofton policia.
Pas ekzaminimeve të mekanizmit të rrethanave që kanë ndikuar në shpërthim do të ketë një njoftim të plotë.
