Izraeli tha se një “epokë e re” lufte po fillonte duke pranuar në heshtje rolin e tij në sulmet e dyfishta që synoni Hezbollahun dhe që e kanë shtyrë Lindjen e Mesme përsëri në prag të një konflikti më të gjerë.
Pothuajse 24 orë pas shpërthimeve që vranë dhjetëra njerëz dhe plagosën më shumë se 2,800, Libani u trondit nga shpërthime më vdekjeprurëse.
Pasi refuzoi të komentonte mbi shpërthimet e së martës, ministri izraelit i Mbrojtjes Yoav Gallant dukej se i referohej sulmeve gjatë një vizite të mërkurën në bazën e Forcave Ajrore Ramat-David në Izraelin verior.
“Ne jemi në fillimin e një epoke të re në këtë luftë dhe ne duhet të përshtatemi,” tha Gallant.
Ai vlerësoi “arritjet e shkëlqyera” të Forcave të Mbrojtjes të Izraelit (IDF), së bashku me agjencinë e sigurisë së vendit, Shin Bet, dhe agjencinë e saj të inteligjencës Mossad.
Shpërthimet erdhën disa orë pasi Izraeli votoi të hënën për të shtuar një tjetër objektiv lufte në konfliktin e tij me Hamasin dhe Hezbollahun të mbështetur nga Irani: sigurimin e kthimit të sigurt të banorëve nga komunitetet përgjatë kufirit të tij me Libanin në shtëpitë e tyre.
Pas gati një viti shkëmbimesh mes Hezbollahut dhe Izraelit, dhjetëra mijëra njerëz janë zhvendosur në Libanin jugor dhe në veri të Izraelit.
Ndërsa kthimi i banorëve izraelitë është kuptuar prej kohësh si një domosdoshmëri politike për qeverinë e kryeministrit Benjamin Netanyahu, kjo është hera e parë që është bërë një objektiv zyrtar lufte./Opinion.al
